६ जेठ, २०८१ | 19 May, 2024
काठमाडौं । मेलम्ची खानेपानी आयोजनाको काम बन्द गर्न गाउँपालिका आग्रह गरेको छ । आज बसेको हेलम्बु गाउँपालिकाको कार्यपालिका बैठकले सर्वसाधारणमा भय र त्रास बढेकाले काम बन्द गर्न आग्रह गरेको हो । आयोजनाका आवश्यक सामग्री गाउँपालिका हुँदै ढुवानी गर्नुपर्ने भएकाले आयोजनाको काम बन्द गर्नुपरेको गाँउपालिकाले जनाएको छ ।
गाउँपालिकाका अध्यक्ष निमा ग्याल्जेन शेर्पाले बुधबार जिल्ला प्रशासन कार्यालयले गापामा औषधि र खाद्यवस्तु बाहेकका कुनै पनि गाडी प्रवेश गर्न नदिनु भन्ने परिपत्र बमोजिम आयोजनाका गाडी प्रवेशमा रोक लगाइएको बताए ।
त्यसैगरी आजको बैठकले गापाको कामबाहेक कर्मचारी र जनप्रतिनिधिलाई गाउँपालिका बाहिर जान रोक लगाएको छ । स्वतन्त्र विश्लेषकहरुले लकडाउनको अवस्थामा पनि परिस्थितिअनुसारको प्रबन्ध मिलाएर आयोजनाको काम जारी राख्न सकिनेमा रोक लगाउने निर्णय हुनु शंकाष्पद भएको टिप्पणी गरेका छन् । यसबाट मेलम्ची खानेपानी आयोजना यस वर्ष पनि सम्पन्न नहुने सम्भावना बढेर गएको छ ।